فخ التدين التعويضي
أنا ممكن أعمل كل الموبقات وأخالف كل تعاليم ديني وشريعتي بس أغضب لله واشتم في سبيل الله وأزعق وأقول إلا ديني وشعائره وكله يكبر ويقولي جزاك الله خيرا على غيرتك ويسلم الي رباك !
نفس المثل لما الطغاة واللصوص والمفسدين المداومين على الصلاة والعمرة وذبح العجول لإطعام العجول يهتفوا لهم.. إدعوا لعم الحاج الله يخليه !
زي المغني الي مقضيها بالطول والعرض وعمل ثروة ويقولك وصيتي لما أموت تحرقوا أغانيا.. آه يا ليل طول.. طب هات الفلوس 
!
هل هناك نمط تدين زرع هذا الفساد في الشرق البائس المنحط أخلاقيا بدرجة كبيرة مع شيوع مظاهر التدين والتعصب والتطرف؟!
طيب علم النفس بيشوف الظاهرة دي إزاي ؟
علم النفس بيسمى النمط ده التدين الشكلي التعويضي!
يعني الدين عنده عصبية وطقوس ظاهرية بعيدة كل البعد عن الضمير الحي والأخلاق.
يعتقد هؤلاء إن أداء شعيرة طقسية (كالعمرة أو الصدقة من مال حرام) يمنحه رصيد يبيح له انتهاك حقوق الناس وسحق كرامتهم .
بدل التوبة الحقيقية (رد المظالم وتحمل المسؤولية) يدي رشوة رمزية تعفيه من وخز الضمير، رشوة في سبيل الله .
بيفكروني بطلب المسامحة على السوشيال يوم عرفة عشان يخلصوا سنتين رايح جاي!
عند الجماعة دول يتحول الغضب لله إلى منفذ لتفريغ الكبت والعدوانية الدفينة باسم حماية الدين.
يمنح الشخص نفسه شرف مجاني وبطولة زائفة عبر الشتم والتهديد، مع أن جوهر الدين إلى هو غالبا ميعرفوش وأبعد واحد عنه هو ضبط النفس وتزكيتها.
الانفصال المعرفي والشيزوفرينيا السلوكية.
لما الفرد بيعزل السلوك اليومي والمعاملات المالية والأخلاقية عن الحيز الديني تماما؛ فالدين فقط في لحظات التهديد الهوياتي أو الاستعراض الطقسي، بينما الحياة بتتعلب بنفعية انتهازية.
ثقافة القطيع وإعادة إنتاج الزيف.
المجتمع بيسقف للمظهر والشعارات الساخنة ويسلام لو فيه إهانة للمختلف وفي نفس الوقت بيتجاهل الأثر العملي للأخلاق.
هنا بيتحول الدين من قوة دافعة للعدل والإحسان إلى غطاء فعال لتبرير الفساد والاستبداد.!
التدين الحقيقي يبدأ من ضبط النفس وتطهير المعاملات، وما دون ذلك ليس سوى استثمار في المظاهر لغسل تشوهات الداخل فاستقيموا يرحمكم الله.
ليست هناك تعليقات: