صلاة الإنسانية بالبلدي
ريم من أريامي زعلانة مني وقالتلي يعم أنا غزالة فخلي البساط أحمدي وكلمني بلغة أفهمها، أنا لا مثقفة ولا غاوية فلسفة فأنت عاوز تقول إيه في صلاة الإنسانية بتاعتك دي بأسلوب بسيط عشان أفهمه وخلي الأبعاد العميقة والألفاظ والرمز دا لناسه، قولي إنت عاوز تقول إيه ببساطةلريمي أو غزالتي أحكي وأقول :
كونك عاوزة تعرفي أنا بقول إيه وإيه سببه وعاوز أوصل لإيه وإيه حقيقة صلاة الإنسانية فانت كده فيلسوفة كبيرة ومش واخدة بالك.
هاتي قلبك وقبله عقلك وقربي ودنك واسمعيني...
عاوز أقول ربنا خلقنا بعقل وإرادة وحرية في حاجات، يعني انت جيتي تسأليني وكان ممكن تسكتي وتعملي أم العريف وكان ممكن تشتمي وتهاجمي من غير متعرفي.. دي حريتك لو تعديتي على غيرك فيه قانون يفصل بينا ولو كانت حاجات في دماغك وتفكيرك ربنا هيحاسبني ويحاسبك ويحكم بينا يوم القيامة فمليش عندك ولا ليكي عندي غير النصيحة بالحسنى.
عاوز أقول عقلي غير عقلك وإنتي مش أنا ولا أنا أنتي وميتعابش عليا ولا عليكي إلا إننا نقل أدبنا مع ربنا، أيوه نقل أدبنا مع ربنا ونرفض العقل إلى كرمنا بيه ونمشي كده ورا الناس ونسيب العقل يصدي لحد منلاقي نفسنا زي الجموسة مربوطة بحبل وساحبها صاحبها، وعلى فكرة دي مش شتيمة للجموسة لأنها ربنا خلقها كده وبتقوم بدورها وبنعيش على خيرها فالشتيمة للإنسان إلي يسيب دوره ويلعب دور غيره من المخلوقات.
عايز أقول ربنا إلى هيحاسبنا وكل المؤمنين باختلاف الايمان بتاعهم ربنا فقلبهم ولو غلطوا في فهم الصح وطالما ربنا سايبهم عايشين وبيرزقهم وحتى الأنبياء كان دورهم النصيحة وتوضيح الطريق الصح يبقى مش من العقل إني أكره الى مش زيي ولا أقتله عشان مش زيي فلو عندي خير سلوكي يعبر عنه وهوه حر ما لم يضر وربنا إلي هيحاسبنا.
عاوز أشوف الجارة إلى بترضع وجارتها مفيش لبن فصدرها فترضع ابن او بنت جارتها وتبقى مريم محمود أخت مريم بطرس في الرضاعة.
عاوز أشوف طبق الملوخية بيطلع من عند أم جرجس لأم عبدالله والملوخية هي هي الملوخية والطبق هو هو الطبق مفرقش بين معدة دا ولا دا..
عاوز أشوف عمر وحسين جمعتهم الصلاة والقبلة والقرآن الواحد حتى لو دا صلى فجامع ودا في حسينية لكن لا بيكرهوا بعض ولا بيقتلوا بعض ولا بيبيعوا بلدهم لحد بحجة إن دا مرشد الجامع والتاني مرشد الحسينية .
عاوز الدم الي بيروي الأرض زي ما هو ميبفرقش بين صعيدي وفلاح، مسلم ومسيحي، كردي وعربي، سني وشيعي في جيوش الأوطان يبقى الدم دا غالي على الكل وحياته حياة للكل وإن كانوا اخواتنا ماتوا سوى احنا لازم نعيش سوى بالحب يا إما هيصطادونا واحد واحد ونموت احنا الكل.
عاوزك تصلي على قد معرفتك وانا اصلي على قد معرفتي واخويا يصلي صلاته وحتى الي مبيصليش ما دام مسالم لا بيأذيني ولا بيعادي بلدي هو حر وفي صلاتنا إلى ممكن تختلف قبلتها وطقوسها وتراتيلها إلا أنها في النهاية قلب عرف ربنا واتجه للسما نقول يارب اهدنا للي تحبه وترضاه.
تعبتك معايا يا غزالتي لكن في النهاية أنا عاوزك تعيشي بالحب تعملي الخير وتساعدي المحتاج وتكريميني لو مش عشان خاطري عشان خاطر ربنا رب الناس رب العالمين إلي أنا صنعته وفيا من روحه.
هي دي تقاطيع وش صلاة الإنسانية يا غزالتي ..
هزت ريمي دماغها وأطلقت سليلها (صوتها) وقالت يارب.
الصورة من اليمن انا ثم معالي الأستاذ رزق الطرابيشي نقيب صحفي الإسكندرية ثم معالي الوزير الاستاذ الدكتور سعيد عبدالعزيز محافظ الشرقية وعميد كلية التجارة الأسبق ثم معالي الدكتور محمد أنسي الشافعي نقيب صيادلة الإسكندرية ثم معالي الاستاذ الدكتور علي إبراهيم الأمين العام لاتحاد الصيادلة العرب ثم معالي الدكتور والشاعر الكبير د.خيري السلكاوي ..من حفل كتاب صلاة الإنسانية
---
التصوير للمخرج التلفزيزني والمصور الفنان ابوعمرو خليفه
للحصول على كتاب "صلاة الإنسانية" للكاتب "الدكتور عاطف عتمان"
ليست هناك تعليقات: