إيه السر ؟.............الشاعرة فاطمة المرسى

..............................

كان ف حارتنا واحنا صغار

عايش عم الشيخ رضوان

راجل مصري بسيط وأصيل

دايما ماشي

رافع راسه فخور فرحان

يصحى يوماتي يصلي الفجر

يقرا شويه من القرآن

ويحفَّظنا حروف الجر

كان بيجُر همومُه وراه

ويعَلِّمنا دروس الصبر !

ولا مرَّه سمعناه قال .. آه

مع انه معجون بالقهر

كل متاع الدنيا حِداه

فرشه حصير ومخده وقُلة

مع كام صحن وطاسه وحلَّة

مَنْقَد طين للشاى والقهوة

كنكه وحضرت فَحْت البحر

كرسي قديم ويا عيني عليه

واقف ومخصماه رجليه

بس الضحكه بتطلع صافية

رغم الفقر .. !

يلا احكيلنا يا شيخ رضوان

إيه السر ..؟

بص علينا .. بس ماردِّش

صلى العصر وخدْنا معاه

هو بيمشي ف سِرُّه يتمتم

واحنا ف دهشه بنمشي وراه

لمَّا وصلنا لِحَد الأرض

مد إيديه .. بالطول والعرض

شفتوا النخل ف حضن الشمس

شفتوا شواشي القمح بتضحك

للمنجل وبتهمس همس

شفتوا خيال الضل موافق

للعصافير تسهر للصبح

شفتوا عيدان القصب السكَّر

ويَّا البنجر

أخدوا قرار هيحاربوا المُر

شفتوا التوتة و الجميزة

جيل ورا جيل حافظين العهد

والصفصاف فارش ضليلة

نازلة فروعُه تبوس الشط

شفتوا النيل الحابي مِحابي

ع الزرعات وبيسقى بحب

كل خطوط الأرض السمرا

خط بخط

شفتوا سواقي الخير ماتوِّنش

تروي قلوبنا وتطرح شهد

شوفتوا الميَّه عسل ف الترعة

يرقص من طراوتها الورد

وابو قردان شغال ددبان

يجري شمال ويمين ويرد

شفتوا الناس الحلوه يوماتي

معاونين بعض

شفتوا سمار الطمي ف لونْهم

وعيونهم تنطق بالوِد

اللي بيزرع

واللي بيحصد

واللي بيدرس

واللي يحب الخير للتاني زى الفرض

واللي يشيل اللقمة لغيره

وهوَّ جعان

واللي يغطي بهدْمِتُه جاره

لو بردان

حتى الضلة .. قبل ما تمشي

بتاخد إذن من النعسان

شفتوا الناس ياولاد ازاى

حضن أمان

هيَّه دي مصر ....

رغم هموم الدنيا عليها

هتفضل مصر

.....................

فاطمة المرسي

من ديوان / مَوْلِد السيدة مصر