صورة أرشيفية
فى سوق الكيت كات وجولة لقناة الجزيرة إستنهضنى من النوم حوار من مزيع القناة مع بائعة خضار ...
شعور إنتابني بصدق السيدة وعفوية كلامها ومع بساطته فهو معبر بصورة كبيرة ...
وهى ترسم بكلماتها البسيطة المعبرة ملامح الصورة ببراءة وعفوية ومهارة ...
بائعة الخضار تكلمت بصوت المصرية البسيطة الغير مسيسة لا مع ولا ضد ...
الحوار بدايته مع أسعار الخضار وبراءة التجار من غلو الأسعار .
--إحنا بنجيب غالى فبنبيع غالى وإحنا ملناش ذنب --
--الأستاذ محمد مرسى إحنا إنتخبناك راجل إسلامي ربنا يعينك
إنتخبناك وبيقولولى إنتخبتيه طب عملك إيه ؟؟
هو إستلم البلد خربانة بس خربت أكتر --إحنا وقفنا معاك إقف معانا --
أنا سالفة إمبارح 200جنيه والله عشان إديهم لبتاع الخضار --
نزل الأمن يلم البلطجية ..أنا إبني سواق تاكسي قلتله يا أنا يا التاكسى..
زميله أخدوه سرقوا التا كسى وضربوه وأهوه قاعد من الشغل يشتغل إيه ؟
فين الأمن يا أستاذ مرسى يا دكتور ؟؟
يرد عليها المزيع ...إنتى خايفة على إبنك لو إبنك ضابط مش كنتى هتخافى عليه ينزل ؟؟
ترد بائعة الخضار
--ينزلوا مجموعة يلموا البلطجية مش ينزل لوحدة ..أمال حكومة إزاى ؟
يرد المزيع يعنى مش شايفة أى حاجة إتغيرت المرور الزبالة فى الشوارع العيش ؟
ترد بائعة الخضار ..
العيش بنقف طوابير عشان نجيب بجنيه عيش
والشوارع زى ما إنت شايف..
يسأل المزيع ..
ما طول عمر العيش بالطوابير يا حاجة ؟
ترد بائعة الخضار ..
كان طوابير لأنه كان حرامي ودى الوقت جبنا الأستاذ مرسى وبقله يا أستاذ مرسى ربنا معاك إقف جنبنا زى ما وقفنا معاك ونزل الأمن ولم البلطجية وتعبنا بقى عاوزين نشوف خير .....
إنتهى اللقاء مع بائعة الخضار وإستمر الحديث من الجزار لبائعة الفول النابت والجبن القريش
وما بين الأسعار وغياب الأمن وما سماه البعض إنفلات أخلاقى
كان أنين المواطن الذى لا يفرق معاه سلفى ولا إخوانى ..حكومة ولا معارضة ..فالسياسة وتنظير النخب رفاهية ليس للمواطن الكادح وقت ليدخل فى دهاليزها ....
ليست هناك تعليقات: