كفاية يامصرعشمك بقى بزيادة ...د.منال عادل

أنا واحدة ضمن ناس كتير بيحبوكى ووصل حبهم لدرجة العشق لدرجة انهم يموتوا عشانك لدرجة انهم يضحوا بكل حاجه عشانك . لكن احنا شفنا فيكى ناس ثانية يابلدى انت مش هماهم ..ناس بتهينك و ناس بتيبعك ...شفنا فيكى ناس سارقينك ومفيش مكان فيكى للفقير ولامكان لموظف عنده ضمير. ........فيه ناس فيكى يابلدى مش عارفين يتعالجوا علشان المستشفى غالية عليهم وولادهم ممكن يموتوا .........فيه ناس فيكى يابلدى بيخافوا الصبح يطلع عليهم من هم الديون الى شايلينها ............فيه ناس فيكى يابلدى بتنبش فى صناديق الزبالة ......فيه ناس فيكى يابلدى مش لاقية سقف يحميها ...........فيه ناس فيكى يابلدى كل احلامها انها تعيش فى أمان يعنى مش عاوزة تروح مارينا و لا نفسها فى فيلا و لا عربية تتفسح بيها ..........ناس خايفة على ولادها لحسن يجوعوا .... ناس مش لاقية حتى الغطاء ليهم........ناس بس عاوزة تاكل و تعيش.
يامصر هم دول ناسك الطيبة الى كل أملها يكون ليهم نصيب فيكى ,نصيب فى خيرك ,نصيب فى زرعك ,نصيب فى حبك ........ناس نفسها تشوف خيرك من غير رشاوى و مسكنة ولا محسوبية . ناس بتدور على أى فرصه علشان يلاقوا نفسهم لكن بمنتهى السهوله بتسدى يامصر كل أبواب الأمل فى وشوشهم الشابة الى عجزت من كثر الهموم.
جاوبينى كده يامصر .....كم واحد عاطل فيكى ؟؟؟ كم شاب عدى الثلاثين و مش عارف يشتغل و لا يفتح بيت؟؟؟ كم أب عاوز يسيبك و يسافر علشان يوفر لبيته العيش؟؟؟ كم وكم وكم ؟؟؟؟
ليه يامصر سلمتى نفسك للى سارقينك ,للى ناهبينك ,للى بايعينك ....وخلتيهم يتحكموا فينا..وعلشان أنتي أمنا أفتكرنا انك خايفه علينا......يامصر يا أم الدنيا هو احنا مش ولادك الى كل يوم بنموت علشانك ......مش احنا ولادك الى متنا زمان فى سينا ,وكل يوم يموت شهيد علشانك........انتى مش حاسة ان كل يوم بيموت ناسك وجنودك وعلمائـك ..... ويموت شبابك ..... عشان بس كان حلمهم يعيشوا الحرية و الأمان و يشوفوكى يامصر فى أعلى مكان ..........دول كلهم يامصر قدمولك حياتهم علشانك ومش فارق معاهم ...المهم عندهم انهم يشوفكى يابلدى أحسن بلد فى الدنيا .....هم بس عاوزين دمهم يكون له ثمن ويكون غالى و مايتقالش أن أرخص مافيكى يامصر ولادك .
بقولك ايه يامصر ....هو مش كفاية بقى كفايه يامصر بجد تعبنا........هو صوتنا مش عالى علشان تسمعينا .. كفايه يامصر من الظلم هلكتينا.........بصراحة هقولهلك كفايه يامصر أحنا بجد استكفينا وياريت تقوليلى بجد هو انتي معانا ولاعلينا.
وبعدين يامصر هنشوف أيه تانى ظلم وظلام و غلاء و جشع و قمامة فى الشوارع وفساد و تكدس فى المواصلات و أهانة ...عندك ايه تانى ؟؟
أنا بجد خايفة يجى اليوم الى يقول واحد يابلدى بكرهك " يقولها حتى لو بينه و بين نفسه .......شوفى النهاردة كم واحد بيقول أنا زهقت من البلد دى ...أنا قرفت من العيشة في بلدي"" ليه يامصر وصلتى ولادك لكده ’ ليه خليتى الظلم و القهر يعمل فى شبابك كده .
يامصر افتكرى ان الناس الى بتحبك عملت علشانك ثورة و ثورة ...قالت لكل حاجه غلط لأ .. وعلوا صوتهم و الدنيا كلها سمعتهم.. صوتهم كان عالى علشان دايما صوت الحق عالى و الحق جواهم عمره ماهيموت وقالوا لازم يجيبوا حقك و حقهم ده كله كان علشانك عشان تعيشى علشان دايما تبقى أم الدنيا ....ناس كان شايلين كفنهم على أديهم وبيقولوا فى حبك تحيا مصر ونفديكى بالغالى . وقولنا خلاص البلد هتبقى بلد...... وهنشوف فيكى عدالة و حرية والأمل كان مالى نفوسنا ..........هو ليه يامصر الأمل بعيد و مش عاوز يقرب ..هو صعب و لا أنتى متعشمة فينا بزيادة .
يامصر ده أنا كتبتلك واتحسرت معاكى على مصر زمان وحلمت وياكى بعتبة مصر الجديدة .......لا قدرنا نرجعك زى زمان و لا شايفالك بكرة .
والله حبك يا مصر ساكن في قلب كل واحد عايش على ارضك الحزينة وعاوزينك تكونى أحسن بلد فى الدنيا ولكن مش عارفة ليه يامصر أنتى عاوزة تفضلى كده محلك سر.
أنا بجد أسفة يامصر انى بقولك كده بس أنا خايفة على الحب الى جوايا ...عاوزين نرتاح فيكى ..نرتاح بيكى ...احنا صحيح تعبنا لكن لسة عاوزينك وحابينك وشارينك علشانا و علشان ولادنا
والله يا مصرحبك برضه غالب و أنت أحب وأغلي وأجمل بلاد الله ......أحب وأجمل شوارع الدنيا وصدقيني يا مصر أرضك وترابك وزرعك وبيوتك وناسك وهواكي هي أجمل واغلي من أي مكان تاني غيرك . بس احنا ولادك لسه فينا النفس ومصممين وصامدين عشان نشوف فيكى الحب يوم علشان نحس معنى الكرامة ونعيش العدل فيكى . وهنفضل دايما نهتف بنحبك يا بلادى بجد بنحبك يا مصر وكل همنا ان احنا نرجعك تاني مصر البهية وسط البلاد اللي حواليكي وهانصون أرضك ومالك وهواكي وترابك.. مش هنسافر .. مش هنسيبك مش هنبطل نحبك.
بس أرجوكى يامصركفاية عشم فينا علشان بجد عشمك بقى بزيادة .