الشعب عاوز ايه ؟
سؤال بالف جواب
الشعب تايه ليه ؟
في طريق ومليون باب
يسقط فلان يحيا فلان
صبح الوطن مذهول
وبامتياز حيران
شعارات كتير
وكلام كبير
مابين جدال وجدال
رسموا المصير ف مقال
والكل في الفلسفة
بجدارة حط نيشان
يسقط فلان .....
وفلان ماهوش سامع
يعيش فلان .....
وفلان ماهوش نافع
جاى الطوفان
والشعب مش داري
ان الضمير واقع
من خيبته مقدرشي
على ثورته يداري
الشعب عاوز ايه ؟
وايده مش طايله
مافضلش ف رصيده
غير اليفط عاليه
من مدبحه للقضا
لشكوى او فضفضة
على ثورة مسروقة
ودولة مسلوقة
كلام وطار ف الفضا
بقت الارادة سراب
وللسقوط آيله
.................
فاطمة المرسي
ليست هناك تعليقات: