مفيش دليل..........وأنا المسؤول,,بقلم د عاطف عتمان

     الإسكندرية 3/6/2012                بقلم  د عاطف عتمان

مفيش دليل...

وأنا المسؤول..

                          ...أنا الدليل..

السحابة السودا فى السما..

والنفس مكتوم..

وغبار المصانع كسى..

والأسمنت مهموم..

والنيل بطوله إشتكى...

وأنا المسؤول..

والقطن المصري بكى..

وطويل التيلة معلول..

وسنابل القمح دبلت..

ومالت من كتر الهموم ...

مالت ومن شعاع الشمس..

هربت وبتلوم..

وفواكه الأمراض بتقول..

إسهال أرت يكاريا...

والسرطان ده الغول..

فشل كلوى..

ولا فيرس سي..

إختار إنته بس وقول ....

مفيش دليل ..

وأنا المسؤول..

                       ...أنا الدليل.....

الأرض إشتكت ..

والسما بكت ..

والنيل مهموم..

مفيش دليل ..

وأنا المسؤول...

وكان الحلم المستحيل....

بق ميه..

لقمة هنية....

نسمة هوا...

تشفى قلبي المعلول... 

مفيش دليل....

 وأنا المسؤول .....

                    ........ أنا الدليل.......

فى المدرسة ...

أحفظ أنا وأقول..

وبعد الجامعة..

على القهاوى ملطوع..

الموهوب ....

....طار....

 وعلى بلاد العم سام ...

حط الرحال والهموم..

وهناك عمل عمايل....

سوى الهوايل..

عمايله  بتقول..

 للحاضر و للغايب...

أنا المصري..
أنا المصرى..

أنا المظلوم... 
أنا الطير المحروم...
مفيش دليل ..
وأنا المسؤل..
                       ... أنا الدليل....

المنحوس..

 عالقهاوى بيبوس..

حجر معسل ..

سادة ولا بغموس..

والفحم بيحرق..

وهو بيتحرق ...

من فحم النفوس..
وبالهموم مهووس...
مفيش دليل ..
وأنا المسؤول..
                     ...أنا الدليل....

الغلبان والجعان...

جرى هربان...

من ذل الهوان...

وكسرة نفس الهيمان...

وفى البحر..
 ركب الموت...

وكان مكانه ...
بطن الحوت....

ومحدود الدخل ...
بقى معدوم....

مفيش دليل.....

 وأنا المسؤول....

                      ....أنا الدليل...

آه يا مصرى

آه يا مصر

فى القسم منهان

وفى المستشفى ..
عيان وعدمان ..

و فرن العيش مقتول..

وعلى أنبوبة الغاز...
....... ملهوف..ملهوف..

 و فالدروس الخصوصية محتاس..
وبين الأكابر منداس...

لو إشتغلت عدمان..                 

ولو عاطل معدوم..

 ومفيش دليل ..

و أنا المسؤول..

                       .....أنا الدليل....

من بعيد..

من بعيييييييد...

شايف مارينا....

شايف أهالينا....

شايف الجنة على أراضينا....

الميه معدنية....

والعيش بسكوت....

والمايوه على الجسم المكشوف...

والهمر والقمر....

الليل نهار...

 والنهار بقى ليل....

والفلوس بتدوس..

كله بالفلوس بيبوس..
كله بيبوووووس...

كله بالفلوس بيدوس

كله على النفوس بيدووووس

والشعب المنحوس...

الكل عليه بيدوس...

بيدووووووس..

مفيش دليل ...

وأنا المسؤول..

                     ....أنا الدليل......

وفى ليلة سودا....

مكنتش أظن ليها نهار..

ورد الجناين فتح....

يا نهار...

  يا نهار....

بنونة و سالى....

وخالد سعيد.....

مصطفى....

 وسيف الله....

بص شوف....

إسلام وأحمد ....

مينا هناك بيبوس...

بيبوس علمك يا مصر....

وعلى ذل السنين..

بيدوس...

وبدمه بيروى عطش السنين ..

الخفافيش صعبان عليها...

والغربان بتنعق..

وإيد الخسيس ممدودة...

بالسم ممدودة...
وبالغدر بالشريف معهودة...

ودم الشهيد ...

بيسيل...بيسيل..

بيغسل مر السنيين..

على الأرض بيرويها....

بيطهرها بينديها.....

ومن على كبرى أكتوبر...

شرب النيل من دمه...

إرتوى...

إكتوى ....

بنار المحب..
وبهمه ...
دم الشهيد ده..
مفيش زيه..

مفيش دليل..

وأنا المسؤول..

                        ...أنا الدليل.....

دم الشهيد....

من النيل شال ....

هم السنين...

وراحت أيام...

وجات أيام....

والقاتل بقى مقتول.....

والجلاد بقى مظلوم...

والفاعل بقى مفعول...

والجاني بقى مجهول....

والدم بقى مهدور...

وآه يا مصري ....

وأه يا مصر...

ده القاتل بقى مقتول ....

والظالم بقى مظلوم.....

والحجة..

مفيش دليل....

 ..أنا العليل...

 أنا الدليل...أنا الدليل