الثانوية العامة ولعنة المجموع 

لعنة المجموع!

أيوة سمعت صح لعنة المجموع! 

كتير سمعنا عن المتفوق إلي كان نفسه يدخل فنون مسرحية أو حقوق وأبوه حلف عليه لو ما دخل طب لا هو ابنه ولا يعرفه!

كتير شوفنا آبناء حققوا رغبات أهليهم ثم بعدها سعوا إلى شغفهم.
كتير من الأولاد عاشوا التعاسة بسبب سجن رغبات الأهل واضطربت نفسياتهم!.

✍️ قبل الجامعات الأهلية والخاصة كان المجموع هو الفيصل والغريب إن المجموع العالي كان أحيانا سبب تعاسة وشقاء لما بيكون بيخدم طموحات الأهل على حساب طموحات وشغف الأبناء فينسج التفوق خيوط مآسي تلتهم العمر.

غالبا التنظير من خارج الدائرة سهل وأكثر عقلانية عن وجودك داخل دائرة التأثير العاطفي والتجربة الذاتية والعاقل من خرج من الدائرة لينظر من الخارج فيرى أبعاد الأمور.

الخلاصة ...

متخليش تفوق ابنك ولا مجموعه لعنة عليه.
ولا رغباتك أنت وتصوراتك قيود تسجنه وتسبب له التعاسة...

ساعدوهم ليعرفوا أنفسهم ويتعرفوا على شغفهم الحقيقي وأنت إياك تستخسر المجموع في شغفك وإياك أن تشغلك نظرة الناس عن نظرتك.

نصيحة ولي أمر

سيب ابنك أو بنتك يختار شغفه ويعيش تصوره لنفسه لا تصورك أنت له.
اكتفي بالنصح وتوسيع المدارك ودحرجة المعلومات في طريقه.
كن شمسا تضيء له ليرى لا عين ترى له.

أوعى تستخسر المجموع في شغفك وانظر بعينك لا عين الناس فلو مجموعك 90 % وشغفك دراسة القانون فادخل الحقوق لكن حدد شغفك بدقة واجمع المعلومات الموضوعية وياريت لو تحضر ورش عمل مختلفة.

ركز في النهاردة وسيبك من بكرة لأن النهاردة هو إلى بيعمل بكرة وسوق العمل ووضع الشباب وواقع البلاد لا يخفى عن أحد لكن اشغل تفكيرك بما يمكنك تغييره وتجاهل ما لا يمكنك تغييره.