نفسك في إيه ؟ نفسي أتولد من جديد

✍️ نفسي
أتولد من جديد
ألاقي نفسي ويا ضي الشمس 
مخلوق جديدصفحة بيضا تنور أرضي
أرويها دموع الفرح
أزرعها زغاريد
تطرح  ورود في ليلة عيد
✍️ نفسي
أنام من غير قلق
من غير خوف ولا كابوس
أحلم ببكرة
فلاح من الفجرية يزرع خير
بطة متهنية ويا الصبية
والغزل مالي النول من جديد 
نول مليان شوق وياه حنين
الديك 
يرجع يأدن من جديد
✍️ نفسي 
ألبس المريله 
سندوتش فول ويا الحلاوه
أتعلم بجد من جديد
حا ضمه حوو
با ضمه بوو
حبوو.. ❤️
دا العلم نور
✍️ نفسي
ألاقي النيل بيضحك بعد الأنين
راكيه والعه  
تطفي نار الشوق والحنين
كوز دره أخضر  
وكوباية شاي  
وياها الأمل يضوي من جديد.
✍️ نفسي
ألاقي الحب
يطرح سنابل  خير
الطير يغني
وصوت الناي سعيد
يسيب الحزن ويا الأنين
ويقول سلام بعد السلام
نغمة حلوة من غير ملام
✍️ نفسي
آلاقي الفرحة في عيون الصغير والكبير 
بلبس العيد والمصروف الأكيد
الله أكبر ويا ترنيمة عيد
الكل فرحان بعيد سعيد
✍️ نفسي
يلغوا النقد ويا البنكنوت
يلغوا الفقر من جوا البيوت
يلغوا الندابه ويا الديابه
يلغوا الحزن من العيون
✍️ نفسي
أصلي ويا نفسي من غير قيود
أسهر ويا النجوم
ارقص وأغني من غير حدود
مفيش سجون مفيش شجون
✍️ نفسي
النحلة تخاصم سكر النحال
ترجع فراشة  تبوس الزهور
السقا يرجع
ينادي من جديد
مااااااااايه
مين  عطشان
ميلاقيش
فيروي الزرع
ويسيب للطير نصيب
✍️ نفسي
أتولد من جديد
صفحة بيضا
ريشة وماية زعفران
أكتب حياتي من جديد
أكتب قصيدة غزل
للغجرية ليلة عيد
نفسي أتولد من جديد